Verdun கடற்கரை சோகங்கள்: தொடர் உயிரிழப்புகளைத் தடுக்க Montreal நிர்வாகம் புதிய பாதுகாப்புத் திட்டம்
Canada-வின் Montreal நகரில் அமைந்துள்ள Verdun கடற்கரையில் கடந்த ஆண்டு பதிவான தொடர் நீரில் மூழ்கிய மரணங்களைத் தொடர்ந்து, எதிர்காலத்தில் இத்தகைய சோக சம்பவங்களைத் தடுக்கும் நோக்கில், Verdun நிர்வாகம் புதிய பாதுகாப்பு மற்றும் விழிப்புணர்வுத் திட்டத்தை முன்னெடுத்துள்ளது.
உயிர்காப்பாளர்களால் கண்காணிக்கப்படும் நேரங்களில், பிரத்தியேகமாக ஒதுக்கப்பட்ட பாதுகாப்பான பகுதியில் மட்டுமே நீச்சல் அனுமதிக்கப்படும் என்பதை பொதுமக்களுக்குத் தெளிவுபடுத்துவதே இந்த விழிப்புணர்வுத் திட்டத்தின் பிரதான நோக்கம் என Verdun நிர்வாகம் கூறியுள்ளது. 'நீந்துவதற்கு ஒரேயொரு பாதுகாப்பான பகுதி மட்டுமே உள்ளது. பொதுமக்கள் இந்த விதியை கட்டாயம் மதிக்க வேண்டும்' என Verdun நிர்வாகத்தின் தகவல் தொடர்புப் பிரிவு இயக்குனர் Jude Bergeron வலியுறுத்தினார்.
கடந்த கோடை காலத்தில் மட்டும், Verdun கடற்கரையில் மூன்று வெவ்வேறு சம்பவங்களில் மூன்று ஆண்கள் நீரில் மூழ்கி உயிரிழந்தனர். இந்தத் துயரச் சம்பவங்களைத் தொடர்ந்தே புதிய பாதுகாப்பு நடவடிக்கைகள் அறிமுகப்படுத்தப்பட்டுள்ளன. இந்த மூன்று உயிரிழப்புகளுமே, கண்காணிக்கப்படும் நீச்சல் பகுதிக்கு வெளியேயும், அனுமதிக்கப்பட்ட நேரத்திற்குப் புறம்பாகவும் நிகழ்ந்ததாக Jude Bergeron சுட்டிக்காட்டினார். அத்துடன், சில மரணங்களுக்கு மது மற்றும் போதைப்பொருள் பயன்பாடும் முக்கிய காரணியாக இருந்ததும் கண்டறியப்பட்டுள்ளது என்றார்.
இந்த உயிரிழப்புகளைத் தொடர்ந்து, பாதுகாப்பை மேலும் பலப்படுத்தும் நோக்கில், உயிர்காப்பாளர்களுடன் சேர்த்து கூடுதல் பாதுகாப்பு அதிகாரிகளும் கடற்கரையில் பணியமர்த்தப்பட்டுள்ளனர். 'இதற்கு முன்னர் இங்கு மரணங்கள் நிகழ்ந்திருந்தாலும், கடந்த ஆண்டே மிகவும் மோசமானதாக அமைந்தது. இந்த ஆண்டு அதுபோன்ற சம்பவங்கள் மீண்டும் நிகழ நாங்கள் விரும்பவில்லை. இது அனைவருக்கும் பெரும் அதிர்ச்சியாக இருந்தது' என Bergeron மேலும் குறிப்பிட்டார்.
இக்கடற்கரைக்கு வரும் மக்களின் எண்ணிக்கையும் வெகுவாக அதிகரித்துள்ளது. முந்தைய ஆண்டில் சுமார் 103,000 ஆக இருந்த பார்வையாளர்களின் எண்ணிக்கை, கடந்த ஆண்டில் கிட்டத்தட்ட 206,000 ஆக உயர்ந்துள்ளது, இது 100 சதவீத அதிகரிப்பாகும். 'மெட்ரோ ரயில் நிலையத்திற்கு அருகாமையில் இருப்பதால் மக்கள் இங்கு அதிகம் ஈர்க்கப்படுகிறார்கள். ஆனால், Verdun கடற்கரைக்கு வருகை தந்தால், அதன் விதிகளைப் பின்பற்றுங்கள் என்ற செய்தியை Montreal நகர மக்கள் அனைவருக்கும் கொண்டு செல்ல விரும்புகிறோம்' என Jude Bergeron கோரிக்கை விடுத்துள்ளார்.