Torontoவில் தேடுதல் வேட்டையின்போது துப்பாக்கிச் சூடு: பொலிஸ் அதிகாரி படுகாயம், சந்தேகநபர் உயிரிழப்பு

Canada-வின் Toronto நகரின் வடமேற்குப் பகுதியில் பொலிஸார் மேற்கொண்ட தேடுதல் நடவடிக்கையின்போது இடம்பெற்ற துப்பாக்கிச் சூட்டுச் சம்பவத்தில், பொலிஸ் அதிகாரி ஒருவர் படுகாயமடைந்துள்ளார். இந்த மோதலில் ஈடுபட்ட சந்தேகநபர் உயிரிழந்ததாக அதிகாரிகள் உறுதிப்படுத்தியுள்ளனர்.

வியாழக்கிழமை அதிகாலை, Black Creek மற்றும் Trethewey drives பகுதிக்கு அருகிலுள்ள வீட்டில், ஆயுதங்கள் தொடர்பான தேடுதல் உத்தரவைச் செயல்படுத்த Toronto பொலிஸாரின் அவசரப் பணிக் குழுவினர் (Emergency Task Force) சென்றனர். அப்போது அங்கிருந்த நபருக்கும் பொலிஸாருக்கும் இடையே ஏற்பட்ட மோதல், துப்பாக்கிச் சூட்டில் முடிவடைந்தது.

இந்தத் துப்பாக்கிச் சூட்டில் காயமடைந்த பொலிஸ் அதிகாரி, உடனடியாக மருத்துவமனையின் அவசர சிகிச்சைப் பிரிவில் அனுமதிக்கப்பட்டார். அவரது காயங்கள் கடுமையானவை என்றாலும், உயிருக்கு ஆபத்தில்லை என Toronto பொலிஸ் தலைவர் Myron Demkiw பின்னர் செய்தியாளர்களிடம் தெரிவித்தார்.

இதனிடையே, துப்பாக்கிச் சூட்டில் காயமடைந்து மருத்துவமனையில் அனுமதிக்கப்பட்டிருந்த சந்தேகநபர், சிகிச்சை பலனின்றி உயிரிழந்தார். இச்சம்பவத்தைத் தொடர்ந்து, மாகாணத்தின் சிறப்புப் புலனாய்வுப் பிரிவான Special Investigations Unit (SIU) விசாரணைகளை ஆரம்பித்துள்ளது. பொலிஸார் சம்பந்தப்பட்ட மரணம் அல்லது கடுமையான காயம் ஏற்படும் சம்பவங்களில், SIU தானாகவே விசாரணையை முன்னெடுக்கும் என்பது குறிப்பிடத்தக்கது.