Kenya: அமெரிக்காவின் Ebola மையத்திற்கு எதிரான போராட்டம் வன்முறைக்களமாக மாறியது; துப்பாக்கிச்சூட்டில் ஒருவர் உயிரிழப்பு

Kenya-வின் Nanyuki நகரில், அமெரிக்கர்களுக்காக அமைக்கப்பட்டு வரும் Ebola தனிமைப்படுத்தல் மையத்திற்கு எதிராக நடந்த போராட்டம் வன்முறையாக வெடித்ததில், ஒருவர் சுட்டுக்கொல்லப்பட்டார். நூற்றுக்கணக்கானோர் பங்கேற்ற இந்தப் போராட்டத்தில், பொலிஸார் தடியடி மற்றும் கண்ணீர்ப்புகைக் குண்டுகளைப் பயன்படுத்தியதால் அங்கு பெரும் மோதல் ஏற்பட்டது.

Mount Kenya-வின் அடிவாரத்தில் உள்ள Laikipia விமானப்படைத் தளத்தில் இந்த சர்ச்சைக்குரிய மையம் கட்டப்பட்டு வருகிறது. Ebola தொற்றால் கடுமையாகப் பாதிக்கப்பட்டுள்ள Democratic Republic of Congo (DRC) நாட்டிலிருந்து வரும் அமெரிக்கர்களை இங்கு தனிமைப்படுத்த திட்டமிடப்பட்டுள்ளது. Kenya-வில் இதுவரை Ebola தொற்று பதிவாகாத சூழலில், அதிக ஆபத்துள்ள நோயாளிகளை நாட்டிற்குள் அனுமதிக்கும் திட்டத்திற்கு பொதுமக்கள் மற்றும் உள்ளூர் அரசியல் தலைவர்களிடையே கடும் எதிர்ப்பு வலுத்துள்ளது.

போராட்டக்காரர்கள் டயர்களை எரித்தும், பொலிஸார் மீது கற்களை வீசியும் தங்கள் எதிர்ப்பைப் பதிவு செய்தனர். இதற்குப் பதிலடி கொடுக்கும் விதமாக, பொலிஸார் கண்ணீர்ப்புகைக் குண்டுகளையும், நீர்த்தாரைப் பீரங்கிகளையும் கொண்டு கூட்டத்தைக் கலைக்க முயன்றனர். இந்த மோதலின்போது துப்பாக்கிச்சூடும் நடத்தப்பட்டதாகக் கூறப்படுகிறது. தலையில் குண்டு பாய்ந்த ஒருவர் சம்பவ இடத்திலேயே உயிரிழந்தார். Red Cross அமைப்பின் தகவல்படி, கண்ணீர்ப்புகைக் குண்டு வீச்சில் மேலும் ஒருவர் காயமடைந்துள்ளார்.

'Vocal Africa' என்ற தன்னார்வ அமைப்பின் இயக்குனர் Hussein Khalid, “ஒருவர் இறந்தது உறுதி செய்யப்பட்டுள்ளது. அவரது குடும்பத்தினருக்காகக் காத்திருக்கிறோம்” என்று தெரிவித்தார். இந்த வன்முறைச் சம்பவங்கள் தொடர்பாகப் பலர் கைது செய்யப்பட்டுள்ளனர்.

Kenya நாட்டுக் கொடியை போர்த்தியிருந்த 47 வயதான Priscilla Waimani என்ற போராட்டக்காரர், “Laikipia குப்பை கொட்டும் இடமல்ல. எங்கள் நாட்டில் அமெரிக்கா ஒரு தனிமைப்படுத்தல் மையத்தை அமைப்பதை நாங்கள் ஏற்க முடியாது” என்று ஆவேசத்துடன் குறிப்பிட்டார். 50 படுக்கை வசதிகளுடன், முழுவதுமாக அமெரிக்க ஊழியர்களால் நிர்வகிக்கப்படவுள்ள இந்த மையத்தின் கட்டுமானப் பணிகள், Kenya உயர் நீதிமன்றத்தின் தடையை மீறி நடைபெறுவது குறிப்பிடத்தக்கது.

எனினும், ஜனாதிபதி William Ruto-வின் அரசாங்கம் இத்திட்டத்தைச் செயல்படுத்துவதில் உறுதியாக உள்ளது. பல ஆண்டுகளாக Washington வழங்கி வரும் உதவிகளுக்கு இதுவொரு கைம்மாறு என்று அரசு தரப்பு கூறுகிறது. “சுமார் 25-30 ஆண்டுகளாக அமெரிக்கா சுகாதாரத் துறையில் எங்களுக்குப் பங்காளியாக இருந்து வருகிறது. அவர்களின் ஒரு கோரிக்கையை நிராகரிப்பது மனிதாபிமானமற்றது” என்று ஜனாதிபதி Ruto சமீபத்தில் தெரிவித்திருந்தார்.

Kenya-வின் Ebola தடுப்பு நடவடிக்கைகளுக்காக அமெரிக்கா US$13.5 மில்லியன் நிதியுதவி அளிப்பதாக உறுதியளித்துள்ளது. இந்த மையம் Kenya மக்களுக்கும் பயன்படும் என அந்நாட்டு சுகாதார அமைச்சர் தெரிவித்த போதிலும், Washington தரப்பிலிருந்து இதுகுறித்து எந்த அறிவிப்பும் வரவில்லை. இத்தகைய முரண்பட்ட தகவல்களால் மக்களிடையே குழப்பம் நீடிக்கும் நிலையில், இந்தத் துப்பாக்கிச்சூடு சம்பவம் குறித்து சுதந்திரமான விசாரணை நடத்தப்பட வேண்டும் என மனித உரிமை அமைப்புகள் கோரிக்கை விடுத்துள்ளன. இதனால், அப்பகுதியில் தொடர்ந்து பதற்றம் நிலவி வருகிறது.