கனடாவில் காகத்திடம் கண்டறியப்பட்ட West Nile வைரஸ்: இந்தியாவுக்கு ஆபத்தா? சுகாதாரத் துறை எச்சரிக்கை

Canada-வின் Ontario மாகாணத்தில் உள்ள Guelph நகரில் இறந்த காகத்தின் உடலில் West Nile வைரஸ் இருப்பது உறுதி செய்யப்பட்டுள்ளது. கொசுக்களால் பரவும் இந்த நோய், மீண்டும் அந்தப் பகுதியில் பரவத் தொடங்கியுள்ளதற்கான அறிகுறியாக இது பார்க்கப்படுகிறது.

West Nile வைரஸ் என்பது முதன்மையாகப் பறவைகளைத் தாக்கும் ஒரு நோயாகும். இந்த நோய்த்தொற்றுக்குள்ளான பறவைகளைக் கடிக்கும் கொசுக்கள், பின்னர் மனிதர்களைக் கடிப்பதன் மூலம் வைரஸைப் பரப்புகின்றன. பலருக்கு இந்தத் தொற்று ஏற்பட்டாலும் அறிகுறிகள் வெளிப்படுவதில்லை. சிலருக்கு காய்ச்சல், தலைவலி, உடல்வலி, குமட்டல் மற்றும் தோல் தடிப்புகள் ஏற்படக்கூடும். மிக அரிதான சந்தர்ப்பங்களில், இது மூளைக்காய்ச்சல் போன்ற தீவிரமான நரம்பியல் பாதிப்புகளுக்கு வழிவகுக்கும்.

கனடாவில் இந்த வைரஸ் கண்டறியப்பட்டுள்ள சூழலில், இந்தியாவிலும் இது குறித்த கவலைகள் எழுந்துள்ளன. குறிப்பாக, கேரளாவின் திருச்சூர், மலப்புரம், கோழிக்கோடு மாவட்டங்களில் கடந்த காலங்களில் West Nile காய்ச்சல் பதிவானதை அடுத்து, தற்போது அங்கு முன்னெச்சரிக்கை நடவடிக்கைகள் பலப்படுத்தப்பட்டுள்ளன. அதன் அண்டை மாநிலமான தமிழ்நாட்டிலும் சுகாதாரத் துறை சார்பில் எச்சரிக்கை விடுக்கப்பட்டுள்ளது.

இந்த வைரஸ் தொற்றுக்கு இதுவரை குறிப்பிட்ட சிகிச்சை முறைகளோ, தடுப்பூசிகளோ இல்லை. எனவே, கொசுக்கடியிலிருந்து தற்காத்துக் கொள்வதே சிறந்த தடுப்பு முறையாகும். வீடுகளையும் சுற்றுப்புறத்தையும் தூய்மையாக வைத்து, நீர் தேங்குவதைத் தவிர்க்க வேண்டும். மாலை மற்றும் விடியற்காலை வேளைகளில் உடலை முழுமையாக மறைக்கும் ஆடைகளை அணிவதும், கொசு விரட்டிகளைப் பயன்படுத்துவதும் அவசியம் என சுகாதாரத் துறை அறிவுறுத்துகிறது.

பறவைகளே இந்த வைரஸ் பரவலுக்கு முக்கியக் காரணமாக இருப்பதால், பொதுமக்கள் இறந்த பறவைகளைக் கண்டால், அவற்றை வெறும் கைகளால் தொட வேண்டாம் என்றும், உடனடியாக உள்ளூர் சுகாதாரத் துறைக்குத் தகவல் தெரிவிக்க வேண்டும் என்றும் அறிவுறுத்தப்பட்டுள்ளது. Canada-வில் காகத்தின் மூலம் வைரஸ் பரவல் கண்காணிக்கப்படுவதைப் போல, இந்தியாவிலும் சுகாதார அமைப்புகள் தீவிர கண்காணிப்புப் பணிகளில் ஈடுபட்டு, நோய் பரவலைத் தடுக்கத் தேவையான நடவடிக்கைகளை மேற்கொண்டு வருகின்றன.