சந்திரனை வெற்றிகரமாகச் சுற்றி வந்த ஆர்டெமிஸ் II விண்வெளி வீரர்கள்: வெள்ளை மாளிகையில் டொனால்ட் ட்ரம்ப்புடன் சந்திப்பு
சந்திரனைச் சுற்றி வந்து வரலாற்றுச் சாதனை படைத்த ஆர்டெமிஸ் II விண்வெளி வீரர்கள், புதன்கிழமை அன்று வெள்ளை மாளிகையில் உள்ள ஓவல் அலுவலகத்தில் அமெரிக்க ஜனாதிபதி டொனால்ட் ட்ரம்பைச் சந்தித்தனர். நாசாவின் ரீட் வைஸ்மேன், விக்டர் குளோவர், கிறிஸ்டினா கோக் மற்றும் கனடா விண்வெளி நிலையத்தின் ஜெரமி ஹேன்சன் ஆகிய நான்கு வீரர்களும் இந்தச் சந்திப்பில் கலந்துகொண்டனர். இவர்களுடன் நாசா நிர்வாகி ஜாரெட் ஐசக்மேனும் ஜனாதிபதியுடனான இந்த உரையாடலில் இணைந்திருந்தார்.
இந்தச் சந்திப்பின் போது விண்வெளி வீரர்களின் தைரியத்தைப் பாராட்டிய ஜனாதிபதி ட்ரம்ப், "அவர்கள் இதை எப்படிச் செய்கிறார்கள் என்று எனக்குத் தெரியவில்லை. நான் இதைச் செய்ய விரும்பமாட்டேன், ஆனால் நமது நாட்டைப் பெருமைப்படுத்த இவர்களைப் போன்றவர்கள் தேவை" என நெகிழ்ச்சியுடன் குறிப்பிட்டார். தொடர்ந்து நாசா நிர்வாகி ஜாரெட் ஐசக்மேன், 2028-ஆம் ஆண்டு மீண்டும் ஒரு மனிதனை நிலவின் மேற்பரப்பில் தரையிறக்கும் திட்டங்கள் குறித்து விளக்கமளித்தார். அதற்கு பதிலளித்த ட்ரம்ப், தனது ஜனாதிபதி காலத்திலேயே மற்றொரு மனிதன் நிலவில் நடப்பதற்கான 'நல்ல வாய்ப்பு' உள்ளதாகவும், அதற்கான அனுமதியை ஏற்கனவே வழங்கிவிட்டதாகவும் தெரிவித்தார். மேலும், சந்திரனைத் தொடர்ந்து செவ்வாய் கிரகத்திற்குச் செல்வதே அடுத்த இலக்கு என்றும் அவர் உறுதிபடக் கூறினார்.
வழக்கமான தனது பாணியில் இந்தச் சந்திப்பை ஒரு செய்தியாளர் சந்திப்பாக மாற்றிய ட்ரம்ப், பல சர்ச்சைக்குரிய மற்றும் உலகளாவிய விடயங்கள் குறித்தும் கருத்துக்களைப் பகிர்ந்து கொண்டார். குறிப்பாக, உக்ரேன் மற்றும் ஈரான் போர்கள் ஒரே காலப்பகுதியில் முடிவுக்கு வரும் என்று தான் எதிர்பார்ப்பதாகத் தெரிவித்தார். அத்துடன், வேற்றுக்கிரகவாசிகள் மற்றும் அடையாளம் காணப்படாத பறக்கும் தட்டுகள் (UFO) தொடர்பான வகைப்படுத்தப்பட்ட ஆவணங்களை பொதுமக்களுக்கு வெளியிடத் தான் இன்னும் ஆர்வமாக இருப்பதாகக் குறிப்பிட்டார். தனது முதல் பதவிக்காலத்தில் 'ஸ்பேஸ் போர்ஸ்' என்ற இராணுவப் பிரிவைத் தொடங்கியதைப் பெருமையுடன் நினைவு கூர்ந்த அவர், விண்வெளித் துறையில் அமெரிக்காவின் ஆதிக்கத்தை இந்தத் திட்டங்கள் உறுதிப்படுத்துவதாகக் கூறினார்.
மற்றொரு முக்கிய விடயமாக, அமெரிக்காவின் முன்னாள் எஃப்பிஐ பணிப்பாளர் ஜேம்ஸ் கோமி சமூக ஊடகப் பதிவு ஒன்றின் மூலம் தனது உயிருக்கு அச்சுறுத்தல் விடுத்ததாக ட்ரம்ப் இதன்போது குற்றம் சாட்டினார். இந்த ஆர்டெமிஸ் II விண்வெளி வீரர்கள் கடந்த ஏப்ரல் 6-ஆம் திகதி நிலவின் இருண்ட பகுதியைச் சுற்றி வந்து, பூமியிலிருந்து அதிக தூரம் பயணம் செய்த மனிதர்கள் என்ற புதிய சாதனையைப் படைத்தவர்கள் என்பது குறிப்பிடத்தக்கது. அடுத்த கட்டமாக ஆர்டெமிஸ் III விண்வெளித் திட்டம் 2027-ஆம் ஆண்டு செயல்படுத்தப்பட உள்ளதாக நாசா உறுதிப்படுத்தியுள்ளது. இந்தச் சந்திப்பின் புகைப்படத்தை வெள்ளை மாளிகை வெளியிட்டுள்ள நிலையில், அமெரிக்காவின் விண்வெளி சாதனை குறித்து ட்ரம்ப் தனது 'ட்ரூத் சோஷியல்' தளத்திலும் பதிவிட்டுள்ளார்.