மத்திய பிரதேசத்தில் மருத்துவத் துறை அதிர்ச்சி: அரசு சஞ்சீவினி மருத்துவமனைகளில் போலி மருத்துவர்கள்; 3 பேர் கைது, 14 பேர் தலைமறைவு!

மத்திய பிரதேசத்தில், அரசின் தேசிய சுகாதார திட்டத்தின் கீழ் இயங்கும் சஞ்சீவினி மருத்துவமனைகளில் போலி மருத்துவர்கள் பணியாற்றி வந்தது அம்பலமாகி, மாநிலம் முழுவதும் பெரும் அதிர்வலைகளை ஏற்படுத்தியுள்ளது. தமோ மாவட்டத்தில் வெளிச்சத்திற்கு வந்த இந்த விவகாரம், ஒரு பெரிய மோசடி வலையமைப்பை அடையாளம் காட்டியுள்ளது. இது தொடர்பாக இதுவரை மூன்று பேர் கைது செய்யப்பட்டுள்ள நிலையில், மேலும் 14 போலி மருத்துவர்கள் தலைமறைவாகியுள்ளனர்.

தேசிய சுகாதார திட்டத்தின் கீழ், மத்திய பிரதேச அரசு மாநிலம் முழுவதும் சுமார் 783 சஞ்சீவினி மருத்துவமனைகளை நடத்தி வருகிறது. இங்கு ஒப்பந்த அடிப்படையில் 2,000-க்கும் மேற்பட்ட மருத்துவர்கள் பணியமர்த்தப்பட்டு, மாதந்தோறும் சுமார் ரூ.80,000 ஊதியம் வழங்கப்படுகிறது. இந்நிலையில், தமோ நகரில் உள்ள சஞ்சீவினி மருத்துவமனையில் போலி மருத்துவர்கள் இருப்பதாக கிடைத்த ரகசியத் தகவலின் பேரில், சுகாதாரத் துறை அதிகாரிகளும் காவல்துறையினரும் இணைந்து நடத்திய அதிரடி சோதனையில் இந்த மோசடி அம்பலமானது.

விசாரணையில், குமார் சச்சின் யாதவ், ராஜ்பால் கவுர், அஜய் மவுரியா ஆகிய மூவரும் போலியான எம்பிபிஎஸ் சான்றிதழ்களைப் பயன்படுத்தி பணியில் சேர்ந்தது உறுதி செய்யப்பட்டது. இதையடுத்து அவர்கள் உடனடியாகக் கைது செய்யப்பட்டனர். சுகாதாரத் துறை வட்டாரங்களின் தகவல்படி, கைதானவர்கள் சுமார் 10 லட்சம் ரூபாய் வரை கொடுத்து இந்த போலிச் சான்றிதழ்களை வாங்கியுள்ளனர். ஏற்கனவே பணியாற்றும் மூத்த மருத்துவர்கள் அல்லது உயிரிழந்த மருத்துவர்களின் பதிவு எண்களைப் பயன்படுத்தி, நம்பகத்தன்மையை ஏற்படுத்தும் வகையில் இந்த சான்றிதழ்கள் தயாரிக்கப்பட்டுள்ளன. இவர்கள் கடந்த இரண்டு ஆண்டுகளுக்கும் மேலாக நோயாளிகளுக்கு சிகிச்சை அளித்து வந்துள்ளனர் என்பது கூடுதல் அதிர்ச்சியை அளிக்கிறது.

தமோ மாவட்டத்தைத் தொடர்ந்து, இந்த விசாரணை மாநிலத்தின் பிற பகுதிகளுக்கும் விரிவுபடுத்தப்பட்டுள்ளது. முதற்கட்ட விசாரணையில் குவாலியர், மொரேனா உட்பட 10 மாவட்டங்களில் மேலும் 14 போலி மருத்துவர்கள் பணியாற்றுவது கண்டறியப்பட்டது. இந்த தகவல் வெளியானதும், அவர்களில் சிலர் உடனடியாகப் பதவியை ராஜினாமா செய்துள்ளனர்; மற்றவர்கள் பணிக்கு வராமல் தலைமறைவாகிவிட்டனர். தலைமறைவான 14 பேரையும் காவல்துறையினர் தீவிரமாகத் தேடி வருகின்றனர்.

இச்சம்பவம் குறித்து மூத்த காவல்துறை அதிகாரி அலோக் ஸ்ரீவஸ்தவா கூறுகையில், "தேசிய சுகாதார திட்ட அதிகாரிகள் அளித்த புகாரின் அடிப்படையில் வழக்குகள் பதிவு செய்யப்பட்டுள்ளன. இது ஒரு திட்டமிட்ட மோசடி," என்றார். இதனிடையே, சந்தேகம் வலுத்ததை அடுத்து, மாநிலம் முழுவதும் சுமார் 80 மருத்துவர்களின் எம்பிபிஎஸ் சான்றிதழ்கள் தீவிர ஆய்வுக்கு உட்படுத்தப்பட்டுள்ளன. இந்த மோசடி வலையமைப்பின் பின்னணியில் உள்ள முக்கிய குற்றவாளிகளை அடையாளம் காணும் பணி முடுக்கிவிடப்பட்டுள்ளது. இச்சம்பவம், அரசு மருத்துவக் கட்டமைப்பின் மீதான மக்களின் நம்பிக்கையை கேள்விக்குள்ளாக்கியுள்ளது.